18 снежня, Мінск /Кар. БЕЛТА/. Гуманітарны праект "Мінская ініцыятыва" садзейнічае развіццю культурных сувязей паміж Беларуссю, Расіяй і Украінай. Аб гэтым заявіў спецыяльны прадстаўнік Прэзідэнта Расіі па міжнародным культурным супрацоўніцтве Міхаіл Швыдкой на адкрыцці IV Канферэнцыі гэтага праекта, перадае карэспандэнт БЕЛТА.
"Першы раз мы сабраліся ў Мінску 2 снежня 2014 года, калі стала зразумела, што ёсць пагроза разрыву ў сферы культуры паміж беларусамі, расіянамі і ўкраінцамі. Гэта была ініцыятыва і ўкраінскіх, і беларускіх, і расійскіх калег, якія разумелі, што нягледзячы на абставіны і складанасці ў палітычным жыцці культурныя сувязі неабходна захоўваць", - сказаў Міхаіл Швыдкой.
"Гэты значны беларуска-расійска-ўкраінскі праект па праву стаў ужо сур'ёзнай дыскусійнай пляцоўкай для развіцця дыялогу і культурнага супрацоўніцтва трох славянскіх народаў, пляцоўкай, дзе рэалізуюцца навуковыя, культурныя і інфармацыйныя праекты, у тым ліку з удзелам маладзёжнай аўдыторыі, якія садзейнічаюць пабудове гарманічнага свету", - адзначаецца ў прывітанні ўдзельнікам канферэнцыі ад імя міністра інфармацыі Беларусі Аляксандра Карлюкевіча, якое зачытала начальнік упраўлення выдавецкай дзейнасці і гандлю міністэрства Алена Паўлава.
Гэта сустрэча ў Мінску - чацвёртая па ліку. Вынікам творчых кантактаў стаў выхад у свет літаратурнага альманаха Terra Poetica. У першым яго выпуску была прадстаўлена паэзія. Сёння на канферэнцыі адбылася прэзентацыя другога выпуску альманаха, у які ўключана проза аўтараў трох краін.
Раней з поспехам быў прэзентаваны культурна-мастацкі праект "Тры Сафіі". Міхаіл Швыдкой таксама дадаў, што сёння рэалізуецца тэатральны праект для дзяцей з асаблівымі патрэбнасцямі, і ў сакавіку наступнага года плануецца яго прадстаўленне гледачам.
За час канферэнцыі прайшлі семінар перакладчыкаў трох краін, творчая сустрэча пісьменнікаў - аўтараў альманаха Terra Poetica са студэнтамі філалагічнага факультэта БДУ. Запланавана таксама мерапрыемства ў Саюзе пісьменнікаў Беларусі. Але галоўнае - будуць намечаны праекты для далейшай рэалізацыі.-0-
