1 кастрычніка, Брэст /Кар. БЕЛТА/. Майстар-класы па сістэме Станіслаўскага ад буйнейшай еўрапейскай тэатральнай вышэйшай навучальнай установы - Расійскага інстытута тэатральнага мастацтва (ДІТМ) пройдуць у Брэсце з 5 па 7 кастрычніка, паведамілі карэспандэнту БЕЛТА ў Расійскім цэнтры навукі і культуры.
Майстар-класы Stanislavsky. Method пройдуць на базе Брэсцкага акадэмічнага тэатра драмы. Трэнінгі па дысцыпліне "Майстэрства акцёра і рэжысура" будзе весці дэкан рэжысёрскага факультэта ДІТМа вядомы тэатральны рэжысёр і драматург Кацярына Гранітава-Лаўроўская. Пра сваё жаданне ўдзельнічаць у мерапрыемстве ўжо заявілі больш за 50 чалавек. Гэта акцёры і рэжысёры двух брэсцкіх тэатраў, студэнты, выкладчыкі, аматары тэатральнага мастацтва.
Stanislavsky. Method - сумесны праект Рассупрацоўніцтва і ДІТМа. Праграму прафесійнага навучання асновам сцэнічнага майстэрства па сістэме Станіслаўскага запусцілі гэтай восенню. Яна стартавала 21 верасня ў Бішкеку і Баку. Майстар-класы ад лепшых педагогаў старэйшай тэатральнай ВНУ пройдуць таксама ў Гомелі, Ерэване, Гюмры, Душанбэ, Алматы, Ташкенце і Кішынёве. Тэмы заняткаў прапрацоўваюцца з улікам запытаў патэнцыяльных слухачоў, якія самі вызначаюць, які з напрамкаў тэатральнай сістэмы Станіслаўскага для іх найбольш актуальны.
Брэст уключаны ў маршрут акадэмічнага турнэ зусім не выпадкова. Вядомасць гораду ў тэатральных колах прынёс міжнародны фестываль "Белая вежа", ініцыятарамі правядзення якога ў свой час выступілі мясцовыя драматычны і лялечны тэатры. Акрамя таго, БАТД - актыўны ўдзельнік міжнароднага тэатральнага фестывалю краін СНД і Балтыі "Сустрэчы ў Расіі", які штогод арганізуе ў Санкт-Пецярбургу Тэатр-фестываль "Балтыйскі дом".
"Акцёрскае майстэрства, сцэнічная мова - аснова тэатральнага мастацтва. Удасканальваць іх можна бясконца і займацца гэтым трэба штодзённа. Менавіта на гэтыя аспекты нашай дзейнасці мы прасілі звярнуць увагу арганізатараў майстар-класаў па сістэме Станіслаўскага", - сказаў мастацкі кіраўнік Брэсцкага акадэмічнага тэатра драмы Аляксандр Козак.
У далейшым арганізатары праграмы Stanislavsky. Method плануюць пашырыць геаграфію праекта. Матэрыялы пра яго таксама даступны ў instagram Расійскага цэнтра навукі і культуры ў Брэсце @rcnkbrest па хэштэгу #stanislavskymethod.-0-
