28 ліпеня, Магілёў /Сяргей Кулягін - БЕЛТА/. Легенды аўтарскай песні Сяргей і Таццяна Нікіціны (Масква) пасля ўдзелу ў VII Міжнародным музычна-спартыўным свяце "Вялікая бард-рыбалка", што пройдзе 29-31 ліпеня ў п. Грудзічына Быхаўскага раёна, затрымаюцца на адпачынак у Беларусі. Аб гэтым карэспандэнту БЕЛТА паведаміў Сяргей Нікіцін.
Музыканты сёння прыбылі ўжо на фестывальную пляцоўку і размясціліся для адпачынку ў адной з аграсядзіб Быхаўскага раёна, дзе маюць намер правесці цэлы тыдзень. Ім вельмі спадабалася гэта месца ў сасновым бары непасрэдна на беразе вадаёма, і ўразілі пейзажы з відам на востраў. Сяргей Якаўлевіч, вядомы ў бардаўскім асяроддзі як заўзяты рыбак, выказаў пажаданне, як толькі з'явіцца магчымасць, адправіцца за рыбнымі трафеямі, якія водзяцца ў Чыгірынскім вадасховішчы. Арганізатары свята паабяцалі са свайго боку арганізаваць рыбалку на ляшча і карася, якіх багата ў гэтым вадаёме.
Але, вядома, самае галоўнае, чаго чакаюць ад знакамітых расійскіх гасцей, - гэта запланаваны на 29 ліпеня сольны канцэрт, які пачнецца ў 22.40 на галоўнай фестывальнай сцэне. "Мы будзем спяваць як вядомыя і любімыя ўсімі песні, так і пакажам свае новыя творчыя работы", - адзначыў Сяргей Нікіцін. Знакаміты дуэт таксама выступіць 30 ліпеня ў новым творчым праекце бард-рыбалкі - гала-канцэрце "Другі фармат. Альтэрнатыва папулярнай эстрадзе", а для дзяцей Сяргей і Таццяна Нікіціны падрыхтавалі спецыяльную праграму "Гумавы вожык".
Выступленне на бард-рыбалцы Сяргея і Таццяны Нікіціных само па сабе з'яўляецца знакавай падзеяй для краіны, таму што дуэт ужо вельмі працяглы час не выступаў у Беларусі, з поспехам гастралюючы ў Расіі і за яе межамі. "Мы даўно мелі намер запрасіць расійскіх аўтараў-выканаўцаў на наша свята, бо Сяргей Нікіцін як кампазітар і дуэт Таццяны і Сяргея Нікіціных адыгралі ключавую ролю ў станаўленні жанра аўтарскай песні ў Расіі і іншых краінах былога Савецкага Саюза. Не адно пакаленне слухачоў вырасла на іх песнях, а дуэт вядомы не толькі як музычны калектыў, пяючы паэзію, але і як з'ява савецкай і постсавецкай культуры", - адзначыла арт-дырэктар бард-рыбалкі Вольга Залеская.
"Вялікая бард-рыбалка" стартавала ў 2010 годзе. За гэты час свята ператварылася ў яркую і неардынарную мультыкультурную падзею ў Магілёўскай вобласці, аб якой добра ведаюць не толькі ў Беларусі, але і далёка за яе межамі. Штогод ён збірае больш за тры тысячы гасцей і ўдзельнікаў з розных краін.
Арганізатарамі свята "Вялікая бард-рыбалка" выступаюць Быхаўскі райвыканкам, творчае аб'яднанне "Сваё асяроддзе" і МДУКП "Магілёўаблтурыст" пры падтрымцы галоўнага ўпраўлення ідэалагічнай работы, культуры і па справах моладзі Магілёўскага аблвыканкама.
Генеральны партнёр праекта - ААТ "Магатэкс", афіцыйны партнёр - ААТ "Белшына". Генеральны інфармацыйны партнёр - УП "БелТА".-0-
