21 ліпеня, Мінск /Кар. БЕЛТА/. Да 950-годдзя Мінска правядуць конкурс графіці, паведамілі БЕЛТА ў маладзёжнай палаце пры Мінскім гарадскім Савеце дэпутатаў.
Прадугледжана некалькі этапаў. Так, жадаючыя прыняць удзел у конкурсе могуць да 31 ліпеня адправіць заяўку на электронную пошту konkurs-950@tut.by. У матэрыялах трэба пазначыць кантактныя даныя, прозвішча, імя, імя па бацьку, дату нараджэння, спасылкі на старонкі ў сацыяльных сетках, прыкласці фота папярэдніх работ.
На другім этапе, 2-10 жніўня, канкурсантам прапануюць намаляваць эскіз графіці на тэму, названую арганізатарамі, а потым увасобіць малюнак у жыццё (расходныя матэрыялы і пляцоўка для малявання прадастаўляюцца). Апошні этап пройдзе 1-4 верасня, графіцістам трэба распісаць сцяну.
Па выніках творчага спаборніцтва журы вызначыць лепшых маладых стрыт-арт-мастакоў горада.-0-
