20 лютага, Мінск /Кар. БЕЛТА/. У ЗША кінакрытыкі пачалі галасаванне за будучых лаўрэатаў "Оскара", паведамляюць інфармагенцтвы.
"Оскар" уручаецца ў 24 катэгорыях. У гэтым годзе на перамогу ў катэгорыі "Лепшы фільм" прэтэндуюць дзевяць кінакарцін: "Тры білборды на мяжы Эбінга, Місуры", "Прывідная нітка", "Сакрэтнае дасье", "Цёмныя часы", "Заві мяне сваім імем", "Прэч" , "Лэдзі Бёрд", "Дзюнкерк", "Форма вады".
Галасаванне будзе доўжыцца тыдзень. У гэтым годзе кінакрытыкі яшчэ могуць аддаць свой голас як з дапамогай звычайнага папяровага бюлетэня, так і праз інтэрнэт. У 2019 годзе прадугледжана толькі анлайн-галасаванне.
Уручэнне прэстыжнай кінапрэміі пройдзе 4 сакавіка ў Лос-Анджэлесе. Вядучым 90-й па ліку цырымоніі стане комік Джымі Кімел.
Напярэдадні, 19 лютага, была ўручана галоўная кінаўзнагарода Вялікабрытаніі. Прэмію BAFTA ў намінацыі "Лепшы фільм" атрымала драма "Тры білборды на мяжы Эбінга, Місуры".-0-
