28 лістапада, Мінск /Кар. БЕЛТА/. Кораткаметражныя фільмы-намінанты на прэмію "Оскар" на беларускай мове ўбачаць гледачы ў Мінску, паведамілі БЕЛТА ў Палацы Рэспублікі, дзе пройдуць кінасеансы.
Калекцыя Oscar Shorts 2017 з пяці кароткаметражных стужак будзе паказана ў праекце Mova Movie. Агучылі карціны зоркі беларускай эстрады, музыканты, тэле- і радыёвядучыя, дызайнеры і блогеры: Андрэй Бонд, Арцём Рыбакін, Вольга Сацюк, Аляксандр Серыкаў, DJ Selebrium, Іван Вабішчэвіч (Дзядзя Ваня), Вольга Рыжыкава, Юрый Вашчук (ТЭА), Руся Shuma, Вольга Венская, Аляксей Жыгалковіч, Цікота, Берта, Настасся Фальковіч і інш. Удзел у праекце стаў новым вопытам практычна для ўсіх артыстаў, занятых у рабоце над дубляжом.
Цырымонія адкрыцця праекта "Mova Movie: Oscar Shorts 17 на беларускай мове" пройдзе 30 лістапада. У праграме заяўлены выступленні груп Shuma, Pawa, паказ дызайнера Настассі Фальковіч.
Сеансы пройдуць у кіназале Палаца Рэспублікі з 30 лістапада па 15 снежня.
Слоган праекта Mova Movie - "Глядзім на роднай!". Асноўная яго мэта - падарыць людзям магчымасць глядзець сусветнае кіно на роднай мове.
Для перакладу на беларускую мову невыпадкова была выбрана калекцыя Oscar Shorts 17, оскараўскія кінастужкі вылучаюцца сваім хараством і асаблівай эмацыянальнасцю, узнімаюць вострасацыяльныя, актуальныя на сусветным узроўні тэмы.-0-
