Мабільная версія
ДЗЯРЖОРГАНЫ
Апошнія навіны
Усе навіны

Канцэрт у касцёле ў Шэметаве стаў заключным на міжнародным фестывалі класічнай музыкі

Культура 10.08.2018 | 11:12

10 жніўня, Шэметава /Кар. БЕЛТА/. Канцэрт у касцёле Найсвяцейшай Дзевы Марыі ў Шэметаве стаў заключным на міжнародным фестывалі класічнай музыкі "У Шэметаве ў Шастаковічаў, які праходзіў у Мядзельскім раёне 3-9 жніўня, перадае карэспандэнт БЕЛТА.

У канцэртнай праграме прагучала "Элегія" Дзмітрыя Шастаковіча (25 верасня 1906 года - 9 жніўня 1975 года). Твор выканалі беларускія музыканты Таццяна Лявіцкая (першая скрыпка), Дзмітрый Юхневіч (другая скрыпка), Алена Сердзюкова (альт), Алеся Скрабатун (віяланчэль). Акрамя таго, прагучаў твор "Stabat mater" Джавані Батыста Пергалезі ў выкананні Соф'і Петравіч (сапрана, Сербія), Даніелы Енчавай (альт, Балгарыя), а таксама беларускіх музыкантаў Таццяны Лявіцкай, Дзмітрыя Юхневіча, Ганны Патапавай (скрыпка), Алены Сердзюковай, Мікалая Церана (альт), Алесі Скрабатун, Паліны Чаркас (віяланчэль).

"Stabat mater" - сярэдневяковая каталіцкая секвенцыя. Першая частка тэксту расказвае пра пакуты Дзевы Марыі ў час распяцця Ісуса Хрыста, другая - малітва грэшніка да Багародзіцы, якая заканчваецца просьбай аб дараванні яму выратавальнага раю. Тэкст Stabat mater паслужыў крыніцай натхнення для шматлікіх кампазітараў, пачынаючы з XVIII стагоддзя. Цяпер устаноўлена больш за 200 кампазіцый на аснове секвенцыі, у ліку якіх і прыналежная Пергалезі.

Вёска Шэметава - месца, дзе жыў прадзед кампазітара Дзмітрыя Шастаковіча Пётр Шастаковіч. Традыцыя правядзення ў раёне канцэртаў, прысвечаных Дзмітрыю Шастаковічу, была закладзена ў 2016 годзе. Тады ў касцёле ў Шэметаве ўпершыню прайшоў канцэрт беларускіх музыкантаў, прысвечаны 110-годдзю з дня нараджэння кампазітара. На наступны год, у 2017 годзе, у раёне быў арганізаваны другі прысвечаны Шастаковічу канцэрт - ён прайшоў у касцёле Святога Апостала Андрэя ў Нарачы.

У гэтым годзе ўжо было арганізавана некалькі канцэртаў, першы з якіх адбыўся ў касцёле Святога Апостала Андрэя ў вёсцы Нарач. Заключны ж канцэрт фестывалю не выпадкова прайшоў у Шэметаве: 9 жніўня - гэта дзень смерці кампазітара Дзмітрыя Шастаковіча, у гонар якога і быў задуманы фестываль.

Беларуска-французскі музычны праект, які атрымаў міжнароднае развіццё (да яго ў гэтым годзе акрамя музыкантаў з Беларусі і Францыі далучыліся выканаўцы з Балгарыі і Сербіі), пачынаў рэалізоўвацца на грамадскіх пачатках. Галоўным арганізатарам мерапрыемства стаў француз беларускага паходжання кіраўнік французскай асацыяцыі "Абмен: Францыя-Беларусь" Аркадзь Валадось - вялікі паклоннік творчасці Дзмітрыя Шастаковіча. Суарганізатарам праекта з самага пачатку яго існавання стала член праўлення Беларускага саюза жанчын аглядальнік аддзела па асвятленні дзейнасці Прэзідэнта Беларусі БЕЛТА Аліна Грышкевіч, ураджэнка Мядзельскага раёна.

Ініцыятыва была падтрымана Мядзельскім райвыканкамам, Беларускай дзяржаўнай акадэміяй музыкі, касцёламі ў Шэметаве і Нарачы. У гэтым годзе мерапрыемства рэалізуецца пры ўзаемадзеянні з Мінскім аблвыканкамам, Мінкультам, пасольствам Беларусі ў Францыі.-0-

Версія для друку
Навіны рубрыкі Культура
Надвор'e
Мінск
Баранавічы
Бабруйск
Барысаў
Брэст
Варшава
Вільнюс
Віцебск
Гомель
Гродна
Жлобін
Кіеў
Ліда
Мінск
Магілёў
Мозыр
Масква
Орша
Полацк
Рыга
Санкт-Пецярбург
Салігорск

Інфаграфіка

Сяўба азімых збожжавых 2018 У верасні ў гаспадарках рэспублікі пачынаецца сяўба азімых культур. Усяго пад засеў азімымі збожжавымі адведзена 1 309,3 тыс. га.