23 жніўня, Мінск /Вікторыя Апанасёнак - БЕЛТА/. Беларуская група "Дразды" дасць дабрачынны канцэрт на глыбіні 420 м пад зямлёй, паведамілі БЕЛТА арганізатары мерапрыемства.
Канцэрт "У глыбіні калійных руд" адбудзецца 27 жніўня ў салігорскіх шахтах, а атрыманыя ад незвычайнага выступлення грошы будуць накіраваны на дапамогу дзецям. Сертыфікат на агульную суму ўсіх сабраных сродкаў будзе ўручаны дырэктару Беларускага дзіцячага хоспіса ў час канцэрта.
Артысты спяюць свае хіты, а таксама песні з новага альбома, над якім працуюць цяпер.
Госці змогуць спусціцца ў шахты, прагуляцца па падземных галерэях, пракладзеных у масіве калійнай і каменнай солі, і трапіць у непаўторны мікраклімат, напоўнены музыкай і добрым настроем.
Арганізатары адзначаюць, што колькасць чалавек на мерапрыемстве абмежавана - яго змогуць наведаць не больш як 40 гледачоў.
Група "Дразды" ў мінулым годзе адзначыла дзесяцігадовы юбілей і падарыла слухачам альбом "Шчасце". У багажы калектыву 4 студыйныя альбомы, 13 відэакліпаў і перамога ў конкурсе маладых выканаўцаў "5 зорак" у Сочы.-0-