27 чэрвеня, Мінск /Аліна Грышкевіч - БЕЛТА/. Фотавыстава Ірэны Гудзіеўскай "Сімвалы Беларусі. У пошуках... ", прысвечаная Году малой радзімы, адкрылася 26 чэрвеня ў Мастацкай галерэі Міхаіла Савіцкага, перадае карэспандэнт БЕЛТА.
На экспазіцыі прадстаўлена амаль 90 твораў, якія раскрываюць прыгажосць краіны. На пейзажных здымках можна ўбачыць буслоў, зуброў, лён, хлебныя палі, валошкі, Палессе, пушчу і замкі. Фотапраект прызначаны данесці да кожнага сэрца годнасць і аптымізм беларускіх сімвалаў, то міфічнае і сучаснае, што знаходзіцца ў генетычнай памяці народа. За кожным пейзажам - шчырая гісторыя, за кожнай фарбай - павер'е, звычай або песня, і расказаны яны візуальнай мовай сучаснага чалавека - праз мастацтва фатаграфіі.
Паводле слоў аўтара, гэты праект - працяг вялікай аўтарскай тэмы "Зачараванне", якая пачалася больш за восем гадоў таму разам з Тамарай Ганчаровай з трох знакаў - "Пушча. Лён. Прыгажуні".
Член Беларускага грамадскага аб'яднання фатографаў Ірэна Гудзіеўская працуе ў галіне мастацкай фатаграфіі і рэкламы. Пачала творчы шлях з выставы 64 Eme Salon de Printemps ў Парыжы ў 1994 годзе, з тых часоў актыўна ўдзельнічае ў вялікіх выставачных праектах, у журы конкурсаў моды і дызайну, не раз станавілася пераможцай міжнародных фестываляў рэкламы. Фотамастак супрацоўнічае з беларускімі, расійскімі, еўрапейскімі часопісамі.
Убачыць работы Ірэны Гудзіеўскай можна да 29 ліпеня. Уваход свабодны.-0-
