Сцяг Пятніца, 29 сакавіка 2024
Усе навіны
Усе навіны
Культура
24 лістапада 2016, 15:32

Беларускія прыказкі пераклалі на кітайскую мову

24 лістапада, Мінск /Валерыя Гаўрылава - БЕЛТА/. Нацыянальная акадэмія навук Беларусі выпусціць зборнік беларускіх прыказак з іх перакладам на кітайскую мову. Аб гэтым паведаміў сёння дырэктар Цэнтра даследаванняў беларускай культуры, мовы і літаратуры НАН Беларусі Аляксандр Лакатко перад цырымоніяй адкрыцця VІІ Міжнароднай навукова-практычнай канферэнцыі "Традыцыі і сучасны стан культуры і мастацтваў", перадае карэспандэнт БЕЛТА.

"Падыходзіць да канца Год культуры, і мы ўжо можам падвесці вынікі работы вучоных. Напрыклад, мы падрыхтавалі ўнікальнае выданне яркіх узораў традыцыйнай беларускай народнай мудрасці. Прыказкі і прымаўкі прадстаўлены адначасова на беларускай і кітайскай мовах. Выпускам займаецца РУП "Выдавецкі дом "Беларуская навука". Кніга выйдзе ў канцы гэтага года або ў пачатку наступнага", - расказаў Аляксандр Лакатко.

Завершаны таксама сумесны праект з Расійскім этнаграфічным музеем па выданні ўнікальнай калекцыі беларускай этнаграфіі А.К.Сержпутоўскага. Акрамя таго, у Цэнтры даследаванняў беларускай культуры, мовы і літаратуры створаны кластары для аб'яднання намаганняў Акадэміі навук, ВНУ, Міністэрства культуры па навуковым суправаджэнні нацыянальнай палітыкі ў сферы культуры.

Аляксандр Лакатко расказаў аб планах беларускіх вучоных на 2017 год. "Вялікая ўвага будзе ўдзелена даследаванням беларускай дыяспары, яе праблем. Актуальна пытанне захавання гісторыка-культурнай спадчыны, паколькі сучасныя тэндэнцыі ў мастацтве ўступаюць у супярэчнасці з традыцыямі", - адзначыў ён. Таксама дырэктар цэнтра нагадаў, што ў наступным годзе будзе святкавацца 500-годдзе беларускага кнігадрукавання.

VII Міжнародная навукова-практычная канферэнцыя "Традыцыі і сучасны стан культуры і мастацтваў" праводзіцца для абмеркавання ролі навуковых даследаванняў у галіне архітэктуры, выяўленчага і дэкаратыўна-прыкладнога мастацтва, тэатразнаўства, музыкі, фатаграфіі, кіно, экранных відаў мастацтваў у вырашэнні актуальных задач сучаснай культуры. Удзельнікі таксама разгледзяць праблемы вывучэння этнакультурных традыцый, фалькларыстыкі, антрапалогіі. У праграму ўваходзяць прэзентацыя альбома "Традыцыйны беларускі касцюм" і адкрыццё выстаўкі фатаграфій да 140-годдзя фатографа Яна Булгака. Наведвальнікам выстаўкі прадставяць адкрытую лекцыю "Чатыры стылі майстра Булгака", прысвечаную жанрава-стылістычнаму спектру творчай спадчыны фатографа.

У канферэнцыі ўдзельнічаюць вядучыя спецыялісты з Беларусі, Расіі, Украіны, Казахстана, Азербаджайна, Узбекістана, а таксама з КНР і Румыніі. Арганізатарамі форуму выступаюць Нацыянальная акадэмія навук Беларусі і Цэнтр даследаванняў беларускай культуры, мовы і літаратуры НАН.-0-

Падпісвайцеся на нас у
Twitter
Топ-навіны
Свежыя навіны Беларусі