7 чэрвеня, Гродна /Кар. БЕЛТА/. Аўгустоўскі канал 16 чэрвеня прыме фестываль шансона і бардаўскай песні, паведамілі карэспандэнту БЕЛТА ў Гродзенскім раённым культурна-інфармацыйным цэнтры.
У наваколлі шлюза Дамброўка ў гэты дзень пройдзе "Аўгустоўскі фэст". "Адной з галоўных падзей стане выступленне вядомых беларускіх выканаўцаў шансона. Акрамя таго, знатакоў аўтарскай музыкі і паклоннікаў ігры на гітары парадуюць сваімі выступленнямі вядомыя барды. Пачынаючыя выканаўцы на бардаўскім фестывалі атрымаюць унікальную магчымасць праявіць свае таленты і ўпэўнена заявіць пра сябе", - расказалі ў культурна-інфармацыйным цэнтры. Завершыцца свята кастром "Дружбы".
Праграма фестывалю складзена з улікам розных захапленняў і інтарэсаў гасцей. Для аматараў актыўнага адпачынку і камандных гульняў падрыхтаваны экстрэмальныя і вясёлыя забавы, напрыклад, турнір па водным тэнісе, гульня "Перанясі даму", міні-чэмпіянат "Камень-нажніцы-папера". Прэзентуюць і новую гульню "Гольфдуб". Гасцям свята прапануюць таксама прайсці квэст "Фантазіі Кэрала". Будзе арганізавана зона настольных гульняў. Пераможцы спаборніцтваў атрымаюць у падарунак прагулку на цеплаходзе па Аўгустоўскім канале.-0-
