Сцяг Пятніца, 29 сакавіка 2024
Усе навіны
Усе навіны
Культура
25 жніўня 2017, 17:21

Амаль 350 аб'ектаў абноўлены ў Полацку і раёне да Дня пісьменства

25 жніўня, Полацк /Алёна Ціханава - БЕЛТА/. У Полацку і Полацкім раёне да Дня беларускага пісьменства абнавілі амаль 350 аб'ектаў. Гэта лічба агучана сёння на пасяджэнні нацыянальнага аргкамітэта па падрыхтоўцы свята, якое ў Полацку правёў намеснік прэм'ер-міністра Васіль Жарко, перадае карэспандэнт БЕЛТА.

Намеснік прэм'ер-міністра Васіль Жарко

У пасяджэнні аргкамітэта прынялі ўдзел міністр інфармацыі Лілія Ананіч, міністр культуры Барыс Святлоў, прадстаўнікі іншых зацікаўленых міністэрстваў і ведамстваў, абласныя і раённыя ўлады. На пасяджэнні адзначалася, што ў перыяд падрыхтоўкі да свята ў Полацку і раёне праведзены значны аб'ём работ. Рамонт, рэканструкцыя і мадэрнізацыя закранулі амаль 350 аб'ектаў (першапачаткова планавалася 255). На гэтыя мэты з розных крыніц накіравана больш за Br13 млн. Асноўныя аб'екты - Сафійскі сабор, Музей кнігадрукавання, чыгуначны і аўтавакзал, гарадскі Палац культуры.

Міністр інфармацыі Лілія Ананіч

Выступае міністр культуры Барыс Святлоў

"Старшыня райвыканкама паведаміў, што ўсе асноўныя работы ўжо завершаны. Зроблена сапраўды шмат. Дадзена даручэнне ў бліжэйшыя дні адшліфаваць дробныя недахопы і пастарацца зрабіць горад максімальна яркім - павінна быць больш кветак, маляўнічых інфармацыйных матэрыялаў і г. д. Гэта важнае нацыянальнае свята, на якім чакаецца вялікая колькасць гасцей. І мы павінны дастойна прадставіць нашу любімую Беларусь", - сказаў Васіль Жарко.

Сёння ў Полацку каля Сафійскага сабора пачаўся мантаж памятнага знака "Полацк - калыска беларускай дзяржаўнасці", урачыстае адкрыццё якога стане адной з яркіх падзей Дня пісьменства. У бягучым годзе свята будзе прадаўжацца тры дні - з 1 па 3 верасня. На аргкамітэце названы горад, які стане сталіцай Дня пісьменства ў наступным годзе - гэта Іванава Брэсцкай вобласці. Пераемнік урачыста прыме эстафету ў Полацка ў заключны дзень гэтага свята.

Білборд на ўездзе ў Полацк

Пасяджэнне аргкамітэта завяршылася наведваннем асноўных аб'ектаў.-0-

Падпісвайцеся на нас у
Twitter
Топ-навіны
Свежыя навіны Беларусі